త్రివిక్రమ్‌కు షూటింగ్ ముందే మొత్తం డబ్బు ముట్టిందా!?

త్రివిక్రమ్ వంటి స్టార్ డైరెక్టర్ తో సినిమా నిర్మించాలంటే మాటలు కాదు. దాదాపుగా ఓ స్టార్ హీరోతో సమానంగా రెమ్యూనరేషన్ అందుకునే మాటల మాంత్రికుడు... ఈ సారి రొటిన్ కు భిన్నంగా స్టార్ హీరోకు బదులు యంగ్ హీరో నితిన్ తో సినిమా చేయాలని ఫిక్స్ అయ్యాడు. ఈ విషయం తెలుసుకున్న చాలామంది సినీ జనం... త్రివిక్రమ్ శ్రీనివాస్ నితిన్ తో సినిమా తెరకెక్కించనుండటంపై ఆశ్చర్యపోయారు. నాగచైతన్య, నితిన్ లలో ఎవరో ఒకరితో సినిమా చేయాల్సి రావడంతో... త్రివిక్రమ్ నితిన్ ను ఎంచుకున్నాడని ప్రచారం జరుగుతోంది. అయితే... ఈ సినిమా కోసం తనకు రావాల్సిన రెమ్యూనరేషన్ ను సినిమా మొదలుకావడానికి ముందుగానే అందుకున్నాడట టాలీవుడ్ స్టార్ డైరెక్టర్.

మామూలుగా అయితే హీరోలు, దర్శకుల సినిమాకు కమిటయ్యే ముందు రెమ్యూనరేషన్ లోని కొంత భాగాన్ని అడ్వాన్స్ గా తీసుకుంటారు. సినిమా పూర్తై... బిజినెస్ జరిగిన తరువాత మొత్తం పేమెంట్ ను నిర్మాతలు వీరికి ముట్టజెబుతుంటారు. కానీ త్రివిక్రమ్ మాత్రం నితిన్ తో తెరకెక్కించబోయే సినిమాకు అందుకోబోయే మొత్తం 10 కోట్ల రెమ్యూనరేషన్ ను ముందుగానే అందుకున్నాడట. ఈ సినిమా నైజాం రైట్స్ ను, శాటిలైట్ హక్కులను షూటింగ్ మొదలుకావడానికి ముందే తను కొనుగోలు చేస్తానని హామీ ఇవ్వడంతో నిర్మాతలు త్రివిక్రమ్ కు పూర్తి రెమ్యూనరేషన్ ను ముందుగానే ఇచ్చినట్టు ఇండస్ట్రీలో గుసగుసలు వినిపిస్తున్నాయి... ఈ మధ్య కాలంలో మాస్ డైరెక్టర్ వినాయక్ కూడా అల్లుడు శీను సినిమాకు ఈ తరహాలో మొత్తం రెమ్యూనరేషన్ ను షూటింగ్ కు ముందుగానే పుచ్చుకున్నాడని... మళ్లీ త్రివిక్రమ్ కే ఇది సాధ్యమైందని సినీ జనం అనుకుంటున్నారు. మరి షూటింగ్ కు ముందే రెమ్యూనరేషన్ మొత్తాన్నిఅందుకున్న త్రివిక్రమ్... నిర్మాతలకు, హీరో నితిన్ కు ఏ రేంజ్ హిట్ ఇస్తాడో చూడాలి.